Accha Lagta Hai...

Desh ko yun ek jutt dekh
accha lagta hai

Dharm ke naam par
Ek doosre ka khoon bahane waalon
Desh ki buraiyon se tumhe ladte dekh
accha lagta hai

Kehte hai nai peedhi
Bahut aage hai nikal gai
Par yuvaon ko Anna ke saath khade dekh
accha lagta hai

Paise ke liye
Ek doosron ka gala kaat dene walon
Imaandaari ke liye tumhe ladta dekh
accha lagta hai

Hai jinda abb bhi
Tumhare andar ka zameer
Jaan kar ye hume
accha lagta hai

Inn bhaagti daudti sadkon par
Thehra hua
Logon ka hujoom dekh
accha lagta hai

Hai vyast apne kaamon mein sabhi
Fir bhi shaam ko
Mashaal liye khade hazaaron haath dekh
accha lagta hai

Matlabi logon  se bhari
Iss duniya mein
Jann hit ke liye tumhe kuch krta dekh
accha lagta hai

Aye desh vaasiyon
Der se hi sahi
Tumhe apni aatma ki awaaj sunte dekh
accha lagta hai

Bas yuhi datte rehna
Apni maango par atal rehna
Ek sundar desh banane ka sapna
Tumhari aankhon mein dekh
accha lagta hai

Desh ko yun ek jutt dekh
accha lagta hai