Dedicated to all those people who keep inspiring me, who are there for me always.....

Teri uss baat ne 
mera nazariya badal diya
Meri duniya thi kini seemit
Tune daayra badha diya


Jab bhi tune mujhe samjhaya
Mujhe ek naya agaaz mila
Jab bhi mene teri suni
khud ko naya anjaam diya


Raaston mein jab kaante chubhe
Tune mera dard baanta
Lage jab bhi khusiyon ke mele
Tune jashn sabse bada manaya


Honthon se ruthi jab hansi
Tune dil ko gudguda diya
Tujhko tha itna aeitbaar
Ki mene jokhim bhi hans ke utha liya


Tujhse jab bhi mein mili
Roshan mera jahan hua
Mujhse jab kuch nahi hua
Tune aakar mujhe thaam liya

Kuch Lamhe Waqt ke Saath....

Na khusiyon ke aalingan mein
Na gam ke bandhan mein
Tu na baandh payegi mujhe
Apni bediyon ki baahon mein


Ek din waqt ne kaha mujhse kuch aisa hi
Baithi thi jab mein kuch pal uske sang yunhi
Dekh kar uski natakhat si hansi
Ithla ke,mene bhi usse jawaab diya ussi ghadi


Tu har pal mere saath chalega agar
Jindagi kitni berang ho jayegi magar
Luka chipi ka khel khelta hai tu har pahar
Khatte meethe swaadon ka maja lete hai hum magar


Sun kar ye wo kuch ghabra sa gaya
Bola mujhse ye to mujhpar hi ulta aa gaya
Thaam kar haath dheeme se uska
Mene samjhaya usse kuch aisa


Kuch meethi yaadon ka kissa hai tu
Kuch  unche neeche palo ka hissa hai tu
Meri haar aur jeeton ka darpan hai tu
Mein raahi,raasta mera hai tu


Jaisa bhi hai tu
Par hardam mere saath hai tu
Har ghadi karwatein badalta hai tu
Phir bhi mere jeevan ka adhaar hai tu...

Manjilon mein nahi 

hum raaston mein yakin rakhte hai

Manjil par aakar tham jayenge kabhi na kabhi

par ye raaste dete rahenge hume manjilen nai

Ae dil mein teri hi sunungi...

Ae dil mein teri hi sunungi
Toote chahe kitne bhi
par khwaab to mein phir bhi unungi
Koi raah choot jaye adhoori bhi
to nai raah mein chunungi
Ae dil mein teri hi sunungi

Koi kahe isse meri naadani
to wo bhi mein sunungi
Koi kahe isse meri deewangi
to diwaani mein banungi
Ae dil mein teri hi sunungi

Kisi chehre ko de paun kiran roshni ki
mein jindagi ko kuch aise jeeungi
Haar jaun agar mein koi baazi
to kya, kuch dil mein jeet hi lungi
Ae dil mein teri hi sunungi

Rooth jayega agar tu kabhi
to har haal mein tujhe mana lungi
Koi roke ya toke mujhe koi
mein na aabb kisi ki sunungi
Ae dil mein teri hi sunungi